Тенденциозно и со политичка позадина, така министерот за внатрешни работи, Наќе Чулев го оцени синоќешниот инцидент во скопската населба Ченто.
„Граѓаните водени од политичка мисла свесно се изложија на опасност себе и своите сограѓани“, истакна Чулев.
Министерот предочи дека едно лице од тројцата приведени е член на советот на Гази Баба од СДСМ, кој и самиот се претставил пред полицајците.
Чулев кажа дека недоразбирањето се случило поради лиферување лажни информации дека тројцата приведени биле приведени од своите домови и оти биле физички малтретирани во полиција.
Министерот додаде дека по завршување на информативниот разговор со приведените тие биле пуштени, а во своите искази потврдиле дека се приведени на улица и оти врз нив немало примена на насилство.
Лицата коишто го прекршиле полицискиот час ќе се соочат со кривична пријава по член 206.
